2021年10月29日
【#50後好去處】 有冇聽過「斬雞頭、燒黃紙」？
「斬雞頭、燒黃紙」，相信大家細個時都聽過，但千祈唔好誤會係黑社會儀式。香港開埠初期，法律制度尚未完善，所以早期喺香港政府批准下，仍可以沿用中國傳統民俗方法，以「斬雞頭、燒黃紙」方式進行宣誓及裁決華人之間嘅糾紛。 後來香港司法制度漸漸完善，呢種宣誓儀式漸漸成為歷史陳跡。
唔好以為隨便搵個地方斬斬燒燒就可以宣誓作實，其實必須要喺上環文武廟進行，先至有法定效力；由此可見，呢座香港其中一間最早期嘅中式廟宇，喺當時嘅「江湖地位」有幾咁高。
從商廈林立嘅上環往山上走，就會見到文武廟。 未到達大家可能已經會先聞到線香味道；因為寺廟信眾喺廟内點嘅並唔係傳統短線香，而是掛喺廟宇屋樑上可以燃燒幾星期嘅大型螺旋香塔。寺廟外嘅白色牆身同綠瓦屋頂，喺週圍高樓大廈之間別具一格。整個廟宇建築群由文武廟、列聖宮同公所組成，建於 1847 年左右，統稱「文武廟」。「列聖宮」係安放各位聖人及先人牌位嘅地方，而 「公所」早年則係鄉民聚會場所，而家就設有紀念品店同中英對照嘅解簽服務，以服務外國遊客。
文武廟係佛教同道教寺廟，廟中分別供奉兩個唔同嘅神－－文學之神和武術之神。 踏入廟宇紅色大門，裡面有兩個大型神像；綠色拎住毛筆嘅係文神；而紅色帶劍嘅係武神。文武廟歷經多次重修，喺1994年被香港古物諮詢委員會評為一級歷史建築，至2010年仲被列為法定古蹟。
大家不妨抽時間，參觀下香港呢個歷史標誌性建築。距離上環地鐵站大約 15 分鐘嘅步程，參觀完可以沿著石板街行去上環，或者到附近的太平山街一帶行逛，亦可沿荷李活道東南步行前往蘇豪。不過，大家要注意廟宇屬宗教地方，參觀拍照時記得要保持莊嚴肅靜，以免影響其他參拜人仕，而且唔好用閃光燈拍攝呀！
地址: 上環荷李活道124至126號
開放時間: 8：00 AM － 6：00PM (初一、十五及誕期 : 7:00 AM - 6:00PM )
資料來源：東華三院 及文匯報
