2021年11月22日
大家可能喺電影中睇過「濟公」呢個宋朝人物，其實喺上環太平山街有間濟公廟，仲有一個「國際濟公文化協會」，推廣濟公文化。協會噚日為2021國際濟公文化節揭開序幕，會辦一系列活動，除咗展覽，仲設計咗100款濟公貼圖，內容包括日常用語、節慶祝福、表情符號等，畀前往參觀者下載使用。
協會及東井圓佛會以前都有辦文化節，之前因疫情喺網上搞，今年話疫情好轉，將部分公眾參與活動移師濟公廟舉行。濟公廟原為廣福義祠，唔算係一所廟宇，大約於1980年代，濟公神像被搬到嚟，帶旺咗善信人流香火，先被稱為濟公廟。協會噚日搵咗專研中國歷史民俗嘅珠海學院游子安教授介紹故事，話濟公其中一個信俗係「契神」，父母為仔女平安健康成長，會安排畀濟公做契子女，廟宇會要求父母帶子女到廟祈求，並以擲筊決定濟公係咪同意。
負責管理濟公廟嘅東華三院，會喺11月27、28日，12月4、5、11、12、18、19日，喺廟內舉辦多次濟公文化展覽導賞，有興趣者可致電2915 3855或電郵至csd-temples@tungwah.org.hk查詢。
